शुक्रवार, 9 दिसंबर 2011

कैलाश गौतम की एक भोजपुरी कविता

  पुण्यतिथि ०९ दिसम्बर पर मैं अपने प्रिय कवि की एक भोजपुरी कविता पोस्ट कर रहा हूं। आप सुधीजनों के विचारों की हमें प्रतीक्षा रहेगी।   संपादक

कैलाश गौतम  08-01-1944 से 09-12-2006


अमवसा मेला




 












भक्ति के रंग में रंगल गाँव देखा
धरम में करम में सनल गाँव देखा
अगल में बगल में सगल गाँव देखा
अमवसा नहाय चलल गाँव देखा
एहु हाथ झोरा, उहू हाथे झोरा
कान्ही पे बोरी , कपारे पे बोरा
कमरी में केहू, रजाई में केहू
कथरी में केहू, दुलाई में केहू
आजी रगांवत हई गोड़ देखा
घुघुटवै से पूछे पतोहिया कि अइया
गठरिया में अब का रखाई बतइहा
एहरे हउवै लुग्गा ओहर हउवे पूड़ी
रमायन के लग्गे हौ मडूआ के ढूढ़ी
चाउर चिउरा किनारे के ओरी
नयका चपलवा अचारे के ओरी

अमवसा मेला, अमवसा मेला
हइ हउवै भइया अमवसा मेला।।
मचल हउवै हल्ला चढ़ावा उतारा
खचाखच भरल रेलगाड़ी निहारा
एहर गुर्री-गर्रा ओहर लोली लोला
बिच्चे में हउवै सराफत से बोला
चपायल केहू, दबायल हौ केहू
घंटन से उप्पर टंगायल केहू
केहू हक्का-बक्का, केहू लाल-पीयर
केहू फनफनात हउवै कीरा के नीयर
बप्पा रे बप्पा, दइया रे दइया
तनी हमें आगे बढ़े देत्या भइया
मगर केहू दर से टसकलै टसकै
टसकलै टसकै, मसकले मसकै
छिड़ल हौ हिताई-नताई चरचा
पढ़ाई लिखाई, कमाई चरचा
दरोगा बदली करावत हौ केहू
लग्गी से पानी पियावत हौ केहू
अमावास के मेला अमावस मेला
इहइ हउवै भइया अमावस मेला।।

जेहर देखा ओहरै बढ़त हउवै मेला
सरगे सीढ़ी चढ़त हउवै मेला
बड़ी हउवै साँसत कहले गिनाला
एही भीड़ में संत गिरहस्त देखा
सबै अपने अपने में हौं ब्यस्त देखा
टाई में केहू, टोपी में केहू
झुसी में केहू अलोपी में केहू
अखाड़न के संगत के पंगत देखा
कहीं रासलीला कहीं परबचन हौ
कहीं गोष्ठी हौ कहीं भजन हौ
केहू बूढ़िया माई के कोरा उठावै
तिरबेनी मइया में गोता लगावै
कलपबास में घर के चिंता लगल हौ
कटल धान खरिहाने वइसे परल हौ

अमवसा मेला,अमवसा मेला
इहइ हउवै भइया अमवसा मेला।।
बहुत दिन पर चम्पा-चमेली भेटइलीं
बचपन दूनों सहेली भेंटइली
आपन सुनावै आपन सुनावै
दूनों आपन गहना गदेला गिनावैं
असों का बनवलू असों का गढ़वलू
तू जीजा का फोटो अब तक पठवलू
इन्हैं रोकैं इन्हैं टोकैं
दूनौ अपने दुलहा तारीफ झोंकै
हमें अपनी सासू पुतरी तू जान्या
हम्में ससुर जी पगरी तू जान्या
शहरियो में पक्की देहतियो में पक्की
चलत हउवै टेम्पो चलत हउवै चक्की
मनैमन जरै गड़ै लगली दूनौं
भयल तू-तू मैं-मैं लड़े लगली दूनौं
साधू छोड़ावै, सिपाही छोड़ावै
हलूवाई जइसे कराही छोड़वै

अमवसा मेला,अमवसा का मेला
इहइ हउवै भइया अमवसा मेला।।
कलौता माई झोरा हेरायल
बुद्धू बड़का कटोरा हेरायल
टिकुलिया माई टिकुलिया के जोहै
बिजुलिया भाई बिजुलिया के जोहै
मचल हउवै मेला में सगरो ढुंढाई
चमेला बाबू चमेला माई
गुलबिया समत्तर निहारत चलैले
मुरहुवा-मुरहुवा पुकारत चलैले
छोटकी बिटिउवा के मारत चलैले
गोबरधन सरहज किनारे भेटइली
गोबरधन के संगे पउँड़ के नहइली
घरे चलता पाहुन दही-गुड़ खिलाइत
भतीजा भयल हौ भतीजा देखाइत
उहै फेंक गठरी परइलैं गोबरधन
फिर-फिर देखइलैं धरइलैं गोबरधन

अमवसा मेला ,अमवसा मेला
इहइ हउवै भइया अमवसा मेला।।
केहू शाल सुइटर दुशाला मोलावै
केहू बस अटैची ताला मोलावै
केहू चायदानी पियाला मोलावै 
सोउरा केहू मसाला मोलावै
नुमाइस में जाते बदल गयलीं भउजी
देखते डरामा उछल गयलीं भउजी
भइया बेचारू जोड़त होउवैं खरचा
भुलइलै भूलै पकौड़ी मरचा
बिहाने कचहरी, कचहरी चिन्ता
फटल हउवै कुरता फटल हउवै जूता
खालित्ता में खाली केराया बूता
तबौ पीछे-पीछे चलत जात हउवन
गदेरी में सुरती मलत जात हउवन
अमवसा मेला अमवसा मेला
इहइ हउवै भइया अमवसा मेला।।

3 टिप्‍पणियां:

  1. है तो मजेदार और आप में भोजपुरी भाषा में भावों को अभिव्यक्त करने का पूरा सामर्थ्य भी, इसलिए अलग-अलग विषयों पर भी कवितायें लिखिए

    उत्तर देंहटाएं